I dërguari i posaçëm i Bashkimit Evropian për dialogun Kosovë-Serbi, Mirosllav Lajçak, është takuar në Beograd me presidentin serb, Aleksandër Vuçiq.

Drejtori i të ashtuquajturës zyrë për Kosovën në Qeverinë e Serbisë, Petar Petkoviq, ka thënë se në Bruksel pas dy ditësh do të diskutohet për draftin e statutit të Asociacionit të komunave me shumicë serbe.

“Ne e pranuam ftesën e zotit Lajçak për t’u takuar në Bruksel pas dy ditësh, ku do të vazhdojnë bisedimet ndërmjet Beogradit dhe Prishtinës. Pala jonë është shumë e përgatitur dhe shkon me një ekip të veçantë ekspertësh ku do të diskutojmë tekstin e statutit të Asociacionit, që është hapi i parë konkret drejt formimit të Bashkësisë së komunave serbe”, ka thënë Petkoviqi në një konferencë për media pas takimit mes Lajçakut dhe presidentit të Serbisë, Aleksandër Vuçiq, ku ishte i pranishëm edhe Petkoviq.

Petkoviq ka deklaruar se Vuçiqi në takim me Lajçakun ka vënë në dukje faktet për kërcënimin e përditshëm të serbëve në Kosovë, dhe lëvizjet e shumta përshkallëzuese të kryeministrit Albin Kurti./rtk